އަޒީޒު ޖަމާލު

އިސްރާއީލުން އީރާނުގެ ސިޔާދަތަށް އަރައިގަނެ އެތައް އިސްވާރުންނެއް ޝަހީދުކޮށްލައފައި ވާތީ އޭގބަދަލު ހިފުމުގެ ގޮތުން އީރާނުން ދިން މިސައިލު ޙަމާތަލުން އިސްރާއީލުގެ މުހިންމު ވައިގެ މަރުކަޒަކަށް ބޮޑު ގެއްލުމެއް ލިބިފައިވާކަމަށް ސެޓެލައިޓު ފޮޓޯތަކުން ސާބިތުވެއްޖެއެވެ.

ސެޓެލައިޓް ފޮޓޯތަކުން ފެންނަ ގޮތުގައި ދެކުނު އިސްރާއީލުގެ ނަވާތީމް ސަރަހައްދުގައި އޮންނަ "ނަވާތީމް އަސްކަރީ ވައިގެ މަރުކަޒު"ގައި ބަރިއަކަށް ހުރި ޢިމާރާތްތަކުގެ ތެރެއިން އެއް ޢިމާރާތުގެ ފުރާޅުން ވަރަށް ބޮޑު ބާގަނޑެއް ފެނެއެވެ. އެއީ ކީއްވެގެން ކޮން ސަބަބަކާ ހުރެ ލިބިފައިވާ ގެއްލުމެއްކަމެއް ސާފެއް ނުވެއެވެ. މި ކަމާ ބެހޭ ގޮތުން އިސްރާއިލުގެ ކޮމެންޓެއް ލިބިފައެއް ނެތެވެ. މި ބާގަނޑު ފެނުމާ ގުޅިގެން އިސްރާއީލު ސަރުކާރުގެ ބަހެއް ހޯދާން ކުރި ސުވާލުތަކަށް އިސްރާއީލު ސަރުކާރުން އިޖާބަދީފައެއް ނުވެއެވެ. ނަމަވެސް ސެޓެލައިޓް ފޮޓޯ އެ މީހުން ސެންސަރުކުރުމަށް ފަހު، ޢަންމުކުރި އިރު ވެސް އެ ބާގަނޑު ފެންނާން ހުރެއެވެ.

ނަވާތީމަކީ އިސްރާއީލުގެ އަސްކަރިއްޔާގެ އެންމެ ޒަމާނީ މަތީން ހަނގުރަމަދާބޯޓުތަކުގެ ވާސައެވެ.މި ދެންނެވި ފަދަ ޒަމާނީ ވަތީންދާ ބޯޓުތަކުގެ ތެރޭގައި،  އެމެރިކާއިން އުފައްދައިފައިވާ F-35 ލައިޓްނިންގ II ހަނގުރާމަމަތީ ބޯޓުފަހަރު ވެސް ހިމެނެއެވެ.

އިސްރާއީލުގެ އަސްކަރީއްޔާއިން ވަނީ އަސްކަރީ ވައިގެ މަރުކަޒުތަކުގެ ތެރެއިން ބައެއް މަރުކަޒުތަކަށް އީރާނުގެ ޙަމަލާތައް އެރިކަމަށް މި ދިޔަ ބުދަ ދުވަހު އިޢުތިރާފުވެފައެވެ. ނަމަވެސް މާ ބޮޑު ގެއްލުމެއް ނުވާކަމަށް ވެސް ވަނީ ބުނެފައެވެ.

ނަމަވެސް ބޯޓުތައް މަރާމާތުކުރާ ސަރަހައްދުގައި ހުރި އޮފީސް އިމާރާތަކަށް މިސައިލެއް އަމާޒުވުމުގެ ސަބަބުން ވަރަށް ބޮޑަށް ގެއްލުން ލިބިފައިވާކަމަށް ޓައިމްސް އޮފް އިސްރާއީލް ޚަބަރުދެއެވެ. އަސްކަރީ އެހެން މަސްދަރުތަކުން ޚަބަރުލިބިފައިވާ ގޮތުގައި އެ ގެއްލުމުގެ އަސަރު ހަނގުރާމަތީ މަތީންދާބޯޓުފަހަރާއި ޑުރޯނާއި އެހެން މަތީންދާބޯޓުފަހަރާއި ވަރަށް މުހިންމު ބިނާރުތަކަށް ގެއްލުން ލިބިފައިވެއެވެ.

އަނެއްކޮޅުން ލުބުނާނުގެ ގައުމީ ނޫސް އެޖެންސިއިން ޚަބަރު ލިބިފައިވާ ގޮތުގައި ރޭ ފަތިހު ސޫރިޔާގެ ސަރަހައްދީ ރޮނގުގެ ސަރަހައްދަށް އިސްރާއީލުން ވަރަގަދަ ޙަމަލާތަކެއްދީ ލުބުނާނާއި ސޫރިއާ ގުޅުވައިދޭ ބައިނަލްއަގުވާމީ މަގު ވަނީ ހަލާކުކޮށްލައިފައެވެ. މި ތަން ހަލާކުކޮށްލުމަށް ފަހު އިސްރާއީލުގެ އަސްކަރިއްޔާއިން ފަޚުރުވެރިކަމާއެކު ބުނެފައިވަނީ ސޫރިޔާއިން އަސްކަރީ ސާމާނު ލުބުނާނުގެ ޙިޒުބުﷲއަށް އެތެރެކޮށްދޭ މައިމަގު ހަލާކުކޮށްލައިފައިވާނެކަމަށެވެ.

"އިސްރާއީލުގެ ދިފާޢީ ބާރަކުން ހަތިޔާރު ސުމަގުލް ކުރާކަށް ފުރުޞަތެއް ނުދޭނެ. އަދި އެ ފަދަ ފުރުޞަތަށް ހުންނަ ދޮރުތައް ބަންދުކުރާކަށް އިސްރާއީލު ކުޑަކޮށްވެސް ޖެހިލުމެއް ނުވާނެ. މި ހަނދުރާމައިގެ ތެރޭގައި ވާނީ އެ ފަދަ ތަންތަން ސުންނާފަތިކޮށްލައިފައި." އަސްކަރީ ތަރުޖަމާނު އަވިޗޭ އަދްރާއީ ބުނެފައި ވެއެވެ.

އިސްރާއީލު އެހެން ބުނެފައި ވީނަމަ ވެސް އެ މަގަކީ އިސްރާއީލުން ލުބުނާނަށް ބޮން އަޅަމުންދާތީ ސުރިޔާގެ ދުރު ހިސާބުތަކަށް ހިޖުރަކުރާ މީހުން ބޭނުންކުރާ މަގެކެވެ.

އިސްރާއީލުގެ މެދުކެނޑުމެއް ނެތް ލާއިންސާނީ ޢުދުވާންތަކާ ގުޅިގެން އެއްވެސް ބަޔަކަށް ސުލްޙައާއި ހަމަޖެހުން ހޯދުމަކީ އެކަށީގެންވާ  ކަމެއް ނޫނެވެ. އިސްރާއިލުގެ  ޢުދުވާންތަކުގެ ސަބަބުން މެދުއިރުމަތީގެ މަސްރަޙު އިތުރަށް ހޫނުވެ،  ލޭއޮހޮރުވުން ބޮޑު ހަނގުރާމައަކާ ދިމާއަށް މިސްރާބު ޖަހާފައިވާ ކަމަށް ސިޔާސީ ބައެއް މުޙައްލިލުން ލަފާކުރެވެއެވެ. (މަޢުލޫމާތު: ޓައިމްސް އޮފް އިޒްރޭލް/އަލްޖަޒީރާ)